Dagens glimt frå Stryn

Flott bilete frå Visnes med Tonning i bakgrunnen ca. 1912-13. Eg vil tippe at biletet er teke i området der Stryn Hotell og Sølvberg held til idag. Er det nokon som kjenner igjen personane, og fortel det til meg,då vert eg utruleg glad!

Karl J. Bø med hesteslåmaskina si ca. 1955. Karl var fødd i 1908, og var rundt femti år då biletet vart teke. Hest og mann er omtrent midt inne i det som i dag er Sentrumsgården. Eg hugsar mjølkerampen som stod der gardsvegen frå dei øvste gardane i Ytre Bø kom ned på riksvegen. (Har nokon bilete av den?) Det kvite huset midt i biletet var Fredheim. Fredheim var bedehuset til pinserørsla, trur eg, og vart brukt også av Losjen (IOGT). Sjå dagens bilete tysdag f.k. Då skal eg finne meir opplysningar om huset også. Eg trur det skifte namn etter ei oppussing på femtitalet. Odd R. Bøe plukka det ned på slutten av 60-talet (kanskje 1968?) og sette opp hytte på Bøasætra av materialane. Hytta heiter naturleg nok Fredheim. Sonen Are eig den i dag. Foto Tonning har teke biletet.

Sjåfør Otto Simonsson Raudi flytte til Stryn etter den siste Lodalsulykka. Han var fødd 30. mars 1900 og døydde i 1953. Han var gift med Eli Rasmusdtr. Sæten. Dei bygde heimen Rauditun på Tonning i 1938 (Heidi Aud Blomster held til der idag). Det er sagt at Otto køyrde Eidaruta då Ramnefjellet rasa ut i 1936.

LaBuire 1914 modell. Ein av dei tre bilane Nordfjord og Søndmør Automobilselskap kjøpte inn sommaren 1914, då selskapet var nyskipa. Nils og Jakob Friborg kjøpte bilen rundt 1930, og her ser vi Jakob framme til høgre. Lengst bak sit John Eikenes. Til venstre for Jakob skimtar ein Malvin Tonning. Bilen er på veg ned frå Tystigen/Videseter etter ein skidag på fjellet.